Ritþing - Stefnumót við Vigdísi Grímsdóttur

Laugardaginn 5. nóvember 2011, kl. 13:30 - 16:00.

Aðgangur ókeypis

Stjórnandi: Jórunn Sigurðardóttir

Spyrill með henni: Þóra Sigríður Ingólfsdóttir

Hrafn Jökulsson aðstoðaði við undirbúning

Ritþing Gerðubergs hafa verið haldin frá árinu 1999 og eiga nú fastan sess í menningarlífi borgarinnar. Á þingunum er leitast við að veita persónulega innsýn í líf og feril íslenskra rithöfunda. Að þessu sinni verður fjallað um Vigdísi Grímsdóttur og verk hennar. Stjórnandi ritþingsins er Jórunn Sigurðardóttir og spyrill með henni er Þóra Sigríður Ingólfsdóttir. Hrafn Jökulsson var þeim til aðstoðar við undirbúning þingsins. Á ritþinginu mun Vigdís lesa brot úr verkum sínum og Ellen Kristjánsdóttir syngur nokkur lög.

Vigdís Grímsdóttir steig fyrst fram á ritvöllinn árið 1983, þrítug að aldri, með smásagnasafninu Tíu myndir úr lífi þínu, en þá hafði hún lokið kennaraprófi frá Kennaraskóla Íslands (1973), BA-prófi í íslensku og bókasafnsfræði frá Háskóla Íslands (1978) og prófi í uppeldis- og kennslufræði frá Kennaraháskóla Íslands (1982). Næst sendi hún frá sér annað smásagnasafn, Eldur og regn, árið 1985. Fyrsta skáldsaga hennar, Kaldaljós, kom út árið 1987. Þar segir frá ungum dreng sem missir allt sem hann elskar á einu andartaki þegar snjóflóð fellur á þorpið hans. Bókin vakti verðskuldaða athygli og henni var frábærlega vel tekið af bæði gagnrýnendum og lesendum. „Í Kaldaljósi virðist Vigdís ná allt að því fullkomnu valdi á orðunum“, sagði gagnrýnandi Morgunblaðsins meðal annars, og sló tóninn fyrir það sem koma skyldi.

Enn liðu tvö ár og áhrifarík örlagasaga ungrar stúlku, Ég heiti Ísbjörg, ég er ljón, leit dagsins ljós, saga sem hrærði við lesendum og vakti mikil viðbrögð. Eftir það sneri Vigdís sér alfarið að ritstörfum, en hún hafði fram að því starfað sem grunnskóla- og framhaldsskólakennari samhliða skrifum sínum. Og nú sendi hún frá sér hvert skáldverkið á fætur öðru, Stúlkuna í skóginum, Grandaveg 7 og allar hinar sögurnar sem lesendur hennar biðu ætíð með óþreyju. Með einstakri stílgáfu, næmi og innsæi í mannlegan veruleika, þá krákustíga sem lífið kann að bjóða upp á, skapaði hún eftirminnilega sagnaheima. Í nýjustu bók sinni, Trúir þú á töfra?, sem kom út nú á haustdögum 2011, afhjúpar hún enn á ný hin mótsagnakenndu öfl sem manneskjan glímir endalaust við.

Vigdís hefur einnig skrifað fyrir börn og Gauti, vinur minn, frá 1996 var fljótur að rata til sinna og leiða þá inn á ævintýraslóðir. Tvö ljóðasöfn komu út á árunum 1990−1991 og endurminningabókin Sagan um Bíbí Ólafsdóttur skaust upp metsölulistann á augabragði árið 2007.

Vigdís hefur hlotið margvísleg verðlaun og viðurkenningar fyrir ritstörf sín og bækur hennar hafa verið þýddar á fjölda tungumála. Tvö verka hennar hafa jafnframt verið sett upp í leikgerð hjá Þjóðleikhúsinu og gerð hefur verið kvikmynd eftir Kaldaljósi sem frumsýnd var í ársbyrjun 2004.

Trúir þú á töfra? er nafn nýrrar skáldsögu Vigdísar sem kemur út á haustmánuðum. Aðalpersóna sögunnar er stelpa sem málar rauða ketti. Í kaffihúsi Gerðubergs verða sýndar myndir sem Vigdís málaði samhliða skrifunum.

Sögur af stúlkum er bókmenntanámskeið þar sem fjallað verður um höfundarverk Vigdísar. Leiðbeinandi verður Soffía Auður Birgisdóttir og hún fær með sér góða gesti, þær Dagnýju Kristjánsdóttur og sjálfan höfundinn, Vigdísi Grímsdóttur.